İstanbul polisi Şanlıurfa vilayətinin Suruç rayonunda törədilmiş terror aktı nəticəsində çoxsaylı insan tələfatı ilə bağlı hökumət əleyhinə etiraz aksiyasını su şırnaqlarından və gözyaşardıcı qazdan istifadə edib. QAZİLER.AZ-ın APA-ya istinadən verdiyi xəbərə görə, Suruçda törədilmiş terror aktının əleyhinə İstanbulda təşkil olunan aksiyada minlərlə etirazçı qatılıb. Aksiyada Xalq Cümhuriyyət Partiyasının və kürdyönümlü Xalq Demokratik Partiyasının nümayəndələri iştirak edib. Etirazçılar “İŞİD – qatil, AKP (hakim Ədalət və İnkişaf Partiyası) – onun himayədarı” kimi şüarlar səsləndiriblər. Aksiyada çıxış edənlər terror aktına görə məsuliyyəti AKP üzərinə qoyaraq hökuməti istefaya getməyi tələb ediblər.
Polis əvvəl müdaxilə etməsə də, sonradan onun dağıdılması üçün su şırnaqlarından və gözyaşardıcı qazdan istifadə edib.Məlumata görə, bir etirazçı rezin güllədən xəsarət alıb. Saxlanılanların sayı barədə məlumat yoxdur.
Türkiyənin Şanlıurfa vilayətinin Suruç şəhərində törədilən partlayış nəticəsində ölənlərin sayı 30-a çatıb. Hadisənin 18 yaşlı terrorçu qız-kamikadze tərəfindən törədildiyi ehtimal olunur.
