İyunun 29-da NASA-nın Beynəlxalq Kosmik Stansiyasının veb-kameralarında əks olunan görüntülərdən sonra canlı yayım qəflətən kəsilib. İKT.lent.az-ın “Hürriyet”ə istinadən verdiyi xəbərə görə, görüntülərdə 3 ədəd naməlum obyektin dünyadan uzaqlaşdığı görünür.

Görüntülər qısa müddətdə internet şəbəkəsində sürətlə yayılıb və dəfələrlə paylaşılıb. İzləyənlərin böyük əksəriyyəti bu obyektlərin “uçan boşqab” olduğunu bildirib. Onların fikrincə, yadplanetlilərin mövcudluğu və Yer kürəsini ziyarət etməsinə dair artıq kifayət qədər sübut toplanıb. NASA-nın canlı yayını kəsməsi bir çox insan tərəfindən tənqid edilib. Bəziləri isə bu cisimlərin çoxfunksiyalı kosmik gəmi olduğunu iddia edib.

NASA məsələ ilə bağlı rəsmi izahat verməsə də, canlı yayının dayanmasının kameraların dəyişdirilməsi və ya Beynəlxalq Kosmik Stansiya ilə əlaqənin müvəqqəti kəsilməsi ilə əlaqədar ola biləcəyini açıqlayıb.