Aviaşirkət nümayəndələri vurğulayıb ki, problem havada olan təyyarələrə aid edilməyib. “Havada olan təyyarələr təhlükəsizlik şəraitindədir və uçuşu davam etdirirlər. Bizim aviaşirkətin tarixində indiyədək belə genişmiqyaslı hücum olmayıb”, - “LOT” təmsilçiləri deyib.

Frederik Şopen adına Varşava Beynəlxalq Aeroportu bazar günü hakerlərin genişmiqyaslı hücumuna məruz qalıb. Polşanın “LOT” aviaşirkətinin məlumatına görə, bunun nəticəsində onlarla beynəlxalq və daxili reys təxirə salınıb.

“Bu gün günün ikinci yarısında “LOT” yerüstü informasiya sistemlərinə edilən teleinformasiya hücumunun qurbanı olub. Nəticədə 1,4 min nəfər vaxtında yola düşə bilməyib”, - məlumatda bildirilir.

Qeyd olunur ki, hava limanı administrasiyası vəziyyəti nəzarət altına almağa nail olub. “Biz reyslərin mütəmadiliyini mümkün qədər tez bərpa etməyə çalışırıq. Operativ qərargahımız artıq uçuşlar planını hazırlayıb”, - məlumatda deyilir.


Haker hücumuna görə Polşanın Krakov, Vrotslav və Qdansk, Almaniyanın Hamburq və Düsseldorf, eləcə də Kopenhagen, Stokholm, Brüssel və Monako şəhərlərinə reyslər təxirə salınıb, - “TASS” yazır.