ABŞ-ın “Microsoft” korporasiyasının qurğular üzrə icraçı vitse-prezidenti, 2014-cü ildə mobil bölməsi korporasiya tərəfindən satın alınmış “Nokia” şirkətinin keçmiş rəhbəri Stiven Elop vəzifəsini tərk edəcək.

QAZİLER.AZ saytı məlumat verir ki, İKT.lent.az-ın “Lenta”ya istinadən xəbərinə görə, biznes həllər üzrə icraedici vitse-prezident Kirill Tatarinov və strategiya üzrə icraedici vitse-prezident Erik Rudder də korporasiya ilə yollarını ayıracaq.

Şirkətdən bildirilib ki, kadr dəyişiklikləri korporasiyanın yeni strategiyası ilə əlaqədardır. “Microsoft” diqqəti üç əsas istiqamətə - biznes və məhsuldarlığın artırılması alətlərinə, “bulud” platformaları və fərdi kompüterlərə yönəldir.

Strukturun yenidən təşkili çərçivəsində vitse-prezident Terri Mayerson “Windows” əməliyyat sistemi və onun idarəetməsi ilə işləyən qurğularla məşğul olacaq yeni "Windows and Devices Group” bölməsinə rəhbərlik edəcək. Bölmə iki mövcud “Operating Systems Group” və “Microsoft Devices Group” komandasından təşkil olunub.

Həmçinin “Google” şirkətinə qarşı yönələn ziddiyyətli “Scroogled” kampaniyası ilə məşhur olan Mark Penn birbaşa investisiyalar fondu yaratmaq üçün "Microsoft”u tərk edir. Digər versiyaya görə, o, ABŞ prezidentliyinə namizədlərdən birinin komandasına qoşula bilər.