Gürcüstan parlamentinin keçmiş sədri, müxalifətdə olan Demokratik Hərəkat Partiyasının lideri Nino Burcanadze son zamanlar ölkənin Qərb tərəfdaşlarını kəskin tənqid edib və rəsmi Tiflisi Rusiya ilə münasibətləri normallaşdırmağa çağırıb.

ANS PRESS-in məlumatına görə, o, Rusiya mətbuatına verdiyi müsahibədə Ukraynadakı vəziyyətdən söz açıb, ukraynalıların Gürcüstanın buraxdığı səhvlərdən nəticə çıxarmadığını deyib.

Onun sözlərinə görə, indi Rusiya ilə dialoqun genişlənilməsinə ehtiyac var. Bu, mütləq lazımdır. Bunun üçün Gürcüstan rəhbərliyi cəsarət göstərməlidir.

Keçmiş parlament sədri Odessa vilayət administrasiyasının başçısı vəzifəsinə keçmiş prezident Mixail Saakaşvilinin təyinatına da münasibət bildirib: "Bu təyinatda ABŞ-dakı müəyyən dairələrin maraqları var. Onlara Rusiya ətrafında daim qaynar nöqtələr lazımdır. Tamamilə aydındır ki, amerikalılar Saakaşvilidən istifadə edirlər. Bu gün Ukraynada baş verənlər bir layihədir və Rusiyaya qarşı olan kadrlarla həyata keçirilir. Bu mənada Saakaşvili mükəmməl fiqurdur. O, Odessada bütün işləri korlaya bilər və indi buna başlayıb. Mixail bildirir ki, Dnestryanı bölgəni Moldovaya qaytaracaq. Bu, onun tərəfindən edilən sırtıqlıqdır. Biz onun Abxaziyanı və Cənubi Osetiyanı Gürcüstana necə "qaytardı"ğını yaxşı xatırlayırıq.

N.Burcanadze vurğulayıb ki, Saakaşvili ukraynalılar üçün baş ağrısıdır. Mən Ukraynanı və onun xalqını sevirəm, amma əgər ukraynalılar bizim səhvlərimizi təkrarlamağa qərar verdilərsə, bu, səhv addımmdır. Doğrudur, Qərb həmişə Saakaşvilini müdafiə edir. Saakaşvili isə atını ağılla yəhərlədi. İndi Qərb ondan istifadə edir.

"Siz Gürcüstanın rəhbərliyində olsaydınız, Ukraynaya etirazınız nə olardı" sualına qadın partiya sədri belə cavab verib: "Mən rəhbər olsaydım Saakaşvili artıq həbsxanada oturardı. Gürcüstanın indiki rəhbərliyi təəssüf ki, Qərbə meyliliyi saxlamaq üçün hər şeyi edir. Onlar heç də Gürcüstan xalqının tələblərini reallaşdırmağa çalışmırlar."