"Google" xəritə redaktə sistemi - "Map Maker"i müvəqqəti bağlayıb. İKT.lent.az-ın xəbərinə görə, buna səbəb xidmətdən başqa məqsədlər üçün istifadə edənlərin sayının artmasıdır.

Xüsusilə ötən günlərdə "Google Maps"də ortaya çıxan bir görüntü böyük narazılığa səbəb olub. Belə ki, Pakistanın Ravalpindi bölgəsini axtaran istifadəçilər təəccüblü bir görüntü ilə qarşılaşıblar. Görüntüdə "Android" maskotunun"Apple" loqosunun üzərinə ehtiyacını ödədiyi təsvir olunub. Məsələ bəlli olandan sonra "Google" görüntünü aradan qaldırıb və "Apple"dan üzr istəyib.

"Map Maker" ilə edilən bu cür halların qarşısını almaq üçün "Google" sistemi bir müddət bağlı saxlamağı qərara alıb. Mənfi halların qarşısını almaq üçün yeni üsulların hazırlanacağı gözlənilir.