Rusiya Krımı üç dəfə ələ keçirməyə cəhd edib. Axar.az xəbər verir ki, bunu Ukrayna mətbuatına müsahibəsində Andrey İllarionov söyləyib. Onun sözlərinə görə, Moskva buna ilk cəhdi Narıncı inqilab vaxtı, 2004-cü ilin sonu 2005-ci ilin əvvəllərində edib:

“Əməliyyatın yüksək səviyyədə hazırlanmaması Kremli bu planın reallaşdırılmasını dayandırmağa vadar etdi. Bunun ardınca həmin planı 2010-cu ildə həyata keçirmək istəyirdilər. O zaman Ukraynada prezident seçkisi keçirilirdi. Əgər seçkidə Yuliya Timoşenko qalib olsaydı, o zaman rus qoşunları Krıma girəcəkdi. Yanukoviçin qələbəsi bu planı da təxirə saldı. Növbəti cəhd 2015-ci il seçkisi üçün nəzərdə tutulmuşdu. Hər şey Yanukoviçin qalibiyyətinə hesablanmışdı. Lakin Maydan çox tez başladı. O zaman bu hərəkatı nə Kiyevdə, nə də ki Moskvada gözləyirdilər. Ona görə də Putin anneksiyanı 2014-cü ildə reallaşdırmalı oldu”.

Qeyd edək ki, Ukraynada Maydan hərəkatı 2013-cü ilin noyabrından başlayıb. Bunun sayəsində o zamankı prezident Viktor Yanukoviç hakimiyyətdən devrilib.