Noyabrın 4-dən etibarən Özbəkistan məktəblərində payız tətili başlayır. Tətil günlərində övladları ilə daha çox vaxt keçirmək istəyən valideynlər əmək qanunvericiliyində nəzərdə tutulmuş əlavə məzuniyyət hüquqlarından yararlana bilərlər.

Qaziler.az yerli mətbuata istinadən bildirir ki, Özbəkistanın Məşğulluq və Yoxsulluğun Azaldılması Nazirliyindən verilən məlumata görə, Əmək Məcəlləsinin 401 və 402-ci maddələrinə əsasən, bu hüquq 12 yaşınadək iki və ya daha çox uşağı, yaxud 16 yaşınadək əlilliyi olan uşağı olan valideynlərdən birinə (və ya valideyni əvəz edən şəxsə) şamil edilir.

Qanunvericilikdə hansı məzuniyyət növləri nəzərdə tutulub?
• Əlavə ödənişli məzuniyyət: Müddəti 4 təqvim günündən az olmamaq şərtilə hər il verilən əlavə ödənişli məzuniyyət.
• Ödənişsiz məzuniyyət: Valideynlərdən birinin istəyinə əsasən, hər il verilən və müddəti 14 təqvim gününədək olan ödənişsiz məzuniyyət.

Mühüm şərtlər:
• Əlavə məzuniyyətlər növbəti əmək məzuniyyətinə birləşdirilə və ya işəgötürənlə razılaşdırılmaqla bütöv yaxud hissə-hissə ayrılıqda istifadə edilə bilər.
• Bu hüquqdan yalnız müvafiq iş ili ərzində istifadə olunmalıdır. İstifadə edilməyən günlər növbəti iş ilinə keçirilmir.
• Əlavə ödənişli məzuniyyətin pul kompensasiyası ilə əvəz edilməsinə icazə verilmir.

QAZİLER.AZ