ABŞ Konqresinin Nümayəndələr Palatasının üzvü Brayan Fitspatrik bildirib ki, Ukraynanın hərbi təyinatlı “Starshield” peyk rabitəsinə çıxış əldə etməsinə mane olmağa çalışan amerikalı məmurları məsuliyyət gözləyir.

Qaziler.az xəbər verir ki, bu barədə o, "X" sosial şəbəkəsində yazıb. O, bu həftə Ukrayna prezidenti Volodimir Zelenski ilə danışıqlar aparmaq niyyətində olduğunu qeyd edib.

"Mən onu əmin etmək niyyətindəyəm ki, Ukrayna üçün “Starshield” proqramından istifadəni məhdudlaşdırmağa çalışan hər kəs barəsində hərtərəfli araşdırma aparılacaq və o, Konqresdəki ictimai dinləmələr, habelə cavabdeh olan hər hansı bir qurumun və ya onun rəhbərliyinin büdcəsinin dərhal ciddi şəkildə ixtisar edilməsi də daxil olmaqla, tam məsuliyyət daşıyacaq", — deyə siyasətçi yazıb.

Onun sözlərinə görə, Birləşmiş Ştatlar Kiyevə lazımi silahları göndərməlidir.

Oktyabrın 17-də ABŞ-nin dövlət katibi Marko Rubio bəyan edib ki, Ukrayna hazırda “Starshield” sisteminə çıxışdan məhrumdur və bu məsələ ətrafında müzakirələr aparılır.

Bundan bir gün əvvəl isə ABŞ Prezidenti Donald Tramp Ukraynanın “Starshield”ə çıxışını məhdudlaşdırmadığını bildirib və "SpaceX" şirkətinin rəhbəri İlon Maskın da bunu etməyəcəyini vurğulayıb.

QAZİLER.AZ