Fransanın ifrat sağçı prezidentliyə namizədi Marin Le Pen gözlənilmədən Ukraynaya səfər etmək istədiyini bildirib.

Qaziler.az bildirir ki, bu barədə RBC-Ukraine Le Penin sosial media platforması X-dəki paylaşımına istinadən məlumat yayıb.

Le Pen deyib ki, prezident Volodimir Zelenski üçün əlverişli olan istənilən vaxt Ukraynaya gələ bilər.

"Biz bu məsələni (Fransanın Ukraynaya yardım məsələsini - red.) onun üçün əlverişli olan istənilən vaxt müzakirə edə bilərik. Əgər cənab Zelenski bizimlə danışmaq istəsə, mən məmnuniyyətlə Ukraynaya gələrəm. Amma ona demək istəyirəm ki, artıq yardım göstərmək üçün maliyyə imkanlarımız yoxdur", - deyə o bildirib.

Ayrıca olaraq, Le Pen "Zelenskinin əleyhinə olmadığını" vurğulayıb.

Xatırladaq ki, Fransanın ifrat sağçı lideri əvvəllər Fransa prezidenti seçiləcəyi təqdirdə Ukraynaya ikitərəfli yardımı dayandıracağını bildirmişdi.

Onun sözlərinə görə, Fransa yardımını davam etdirməyə "imkanı yoxdur".

QAZİLER.AZ