ABŞ Prezidenti Donald Tramp gözlənilmədən öz kostyumunun markasını açıqlayıb.

Qaziler.az xarici KİV-ə istinadla xəbər verir ki, bu geyim onun adət etdiyi lüks "Brioni" geyimlərindən kəskin şəkildə fərqlənir.

Nebraska ştatının Qrand-Aylend şəhərində keçirilən mitinqdə Tramp tünd göy rəngli pencəyinin önünü açaraq, astara tikilmiş "Jos. A. Bank" etiketini göstərib. Məhz bu Amerika brendi öz kostyumlarını "hər gün aşağı qiymətlər" şüarı ilə reklam edir.

Bu seçim sosial şəbəkə istifadəçilərini təəccübləndirib, çünki uzun illər boyu Tramp ilk növbədə İtaliyanın "Brioni" moda evi ilə əlaqələndirilirdi. O, hələ "The Apprentice" şousunun yayımlandığı dövrlərdən bu brendin kostyumlarını geyinirdi. Tramp 2004-cü ildə işıq üzü görən "Milyarder kimi düşün" (Think Like a Billionaire) kitabında "Brioni" kostyumlarını rəfdən almadığını yazmışdı.

İki marka arasındakı qiymət fərqi kifayət qədər böyükdür. "Jos. A. Bank" kostyumları adətən 250 ilə 580 dollar arasında dəyişir, "Brioni" modellərinin qiyməti isə 5 500 – 16 200 dollara çata bilir.

Bununla belə, Tramp heç də hər zaman yalnız "Brioni" geyinməyib. Onun keçmiş mətbuat katibi Houp Hiks bildirib ki, 2016-cı il prezident seçkilərindən əvvəl o, digər markalara, o cümlədən Nyu-Yorkun "Martin Greenfield Clothiers" brendinə də üstünlük verirdi.

QAZİLER.AZ