Dünyanın ən böyük əyləncə və media şirkəti olan Amerikanın "Walt Disney Co." şirkəti televiziya biznesini yenidən qurmağı planlaşdırır ki, bu da bölmələrin birləşdirilməsi və yüzlərlə iş yerinin ixtisarı mənasına gələ bilər.

Qaziler.az xəbər verir ki, bu barədə mənbələrə istinadən "The Wall Street Journal" məlumat yayıb. Mənbələrin bildirdiyinə görə, "Disney" rəhbərliyi planın təfərrüatlarını müzakirə edir və bu hazırlıq prosesi 2027-ci ilə qədər uzana bilər.

Yenidənqurma biznesin yayım xidmətlərinin xüsusiyyətlərinə uyğun olaraq yenidən qurulmasını nəzərdə tutur. İxtisarların “ABC Entertainment”, “20th Television”, “Hulu Originals”, “National Geographic” və “Freeform” menecerlərinə təsir edəcəyi gözlənilir.

İxtisarlar artıq "Disney"in bir sıra xidmətlərinə təsir göstərib. Sentyabrın 29-da 300-dən çox insan işdən çıxarılıb ki, onların da əksəriyyəti kadrlar (HR) və İT şöbələrində çalışıb. Hüquqi məsələlər və beynəlxalq əlaqələr bölməsində də ixtisarlar planlaşdırılır.

Qeyd edək ki, 2025-ci ilin sentyabr ayının sonuna olan məlumata görə, "Disney"in ştatında təxminən 231 min nəfər çalışır.

QAZİLER.AZ