Nyu-Yorkda yeni ictimai tualetlər quraşdırılacaq. Şəhər meri Zöhran Mamdani bildirib ki, həmin tualetlərdən istifadə müddəti 10 dəqiqə ilə məhdudlaşdırılacaq və vaxt başa çatdıqdan sonra qapılar avtomatik açılacaq.

Qaziler.az bu barədə “nbcnewyork.com”a istinadla xəbər verir.

Pilot layihə çərçivəsində şəhərin müxtəlif ərazilərində ümumilikdə 17 modul tualet quraşdırılacaq. Onlar səhər saat 07:00-dan axşam 22:00-dək fəaliyyət göstərəcək. Tualetlərdən istifadə etmək üçün xüsusi mobil tətbiqdən və ya eyni funksiyanı yerinə yetirən kartdan istifadə etmək tələb olunacaq.

“Bu tualetlərdə müəyyən müddətdən sonra işıq siqnalları yanıb-sönməyə başlayır və bu, şəxsi oradan çıxmağa təşviq edir”, – deyə Mamdani jurnalistin belə məkanlarda narkomaniya, fahişəlik və evsizlərlə bağlı problemlərin qarşısının necə alınacağı barədə sualını cavablandırarkən bildirib.

O qeyd edib ki, modul tualetlərin üzərində istifadə müddətinin 10 dəqiqə olduğu qeyd olunub.

Podratçı şirkətin nümayəndəsi Cessika Haynselman da vurğulayıb ki, çoxsaylı xəbərdarlıqlardan və istifadə müddətinin başa çatdığı barədə bildirişdən sonra qapı sonda avtomatik açılacaq. Onun sözlərinə görə, istifadəçi bu barədə əvvəlcədən dəfələrlə xəbərdar ediləcək.

QAZİLER.AZ