Rumıniyada özündən cəmi 20 santimetr məsafədə olan ayını hiss etməyən turist sosial şəbəkələrin ulduzuna çevrilib.

Qaziler.az xəbər verir ki, “Adevarul” nəşrinin yazdığına görə, hadisə iyulun 27-də baş verib və qonşu avtomobildəki turistlər tərəfindən videoya çəkilib.

Kadrlar Transfəqəraşan dağ magistralında qeydə alınıb. Videoda kişinin arxası ayıya tərəf dayandığı və qayalıqlara baxdığı görünür. Heyvan yavaş-yavaş ona yaxınlaşır, bir neçə santimetr məsafəyə qədər gəlir və hətta onun ayağını iyləyir.

Bütün bu müddət ərzində turist hərəkətsiz qalır. Yalnız ayı onun qarşısına keçdikdə, kişi qaçmağa başlayır. O, yaxınlıqdakı maşının ətrafından dolanaraq öz avtomobilinə çatmağı bacarır, heyvan isə onun arxasınca qaçır.

Video qısa müddətdə sosial şəbəkələrdə geniş yayılıb. İstifadəçilər kişinin ayını həqiqətən görmədiyini, yoxsa heyvanı qıcıqlandırmamaq üçün qəsdən hərəkətsiz qaldığını müzakirə ediblər.

Bəzi izləyicilər videonu çəkən şəxsi avtomobil siqnalı ilə ayını hürkməyə çalışmadığı üçün tənqid ediblər. Lakin yerli sakinlər qeyd ediblər ki, belə bir vəziyyətdə qəfil səs heyvanı qorxuda və onun davranışını daha təhlükəli edə bilərdi.

QAZİLER.AZ