Qananın ən uca boylu kişisi hesab olunan Süleymana Əbdül Səməd 33 yaşında vəfat edib.

Qaziler.az xəbər verir ki, “Daily Mail” nəşrinin yazdığına görə, o, uzun illər bədəninin dayanmadan böyüməsinə səbəb olan nadir genetik xəstəliklə bağlı sağlamlıq problemlərindən əziyyət çəkirdi.

Səməd ayaqlarındakı infeksiyalı yaralar səbəbindən yerləşdirildiyi Tamale şəhərindəki xəstəxanada dünyasını dəyişib. Yaxınlarının sözlərinə görə, yaralar birbaşa xəstəliyin nəticəsi olmasa da, onların yaranmasına çoxsaylı fəsadlar səbəb ola bilərdi.

2022-ci ildə kişinin boyu təxminən 224 santimetr olub. Qohumları onun sonradan daha da uzandığını iddia ediblər. Səmədə skelet, gözlər, ürək və qan damarlarına təsir edə bilən birləşdirici toxumanın irsi xəstəliyi — Marfan sindromu diaqnozu qoyulub. Onun vəziyyəti qeyri-adi boy artımı və dayaq-hərəkət sistemində ciddi problemlərlə müşayiət olunurdu.

Əbdül bildirirdi ki, 20 yaşından sonra sürətlə uzanmağa başlayıb. Zamanla onun onurğasında və hərəkətində problemlər yaranıb. Sağlamlığının pisləşməsi ucbatından o, futboldan və sürücü olmaq arzusundan imtina etmək məcburiyyətində qalıb.

Səməd vətənində yerli məşhura çevrilmişdi. Qohumları onu xeyirxah və comərd bir insan kimi xatırlayırlar. Məhz onun sayəsində yaşadığı kiçik Qambaqa kəndi bütün ölkədə tanınıb.

QAZİLER.AZ