"Apple" şirkəti istifadəçilərin şəxsi məlumatlarının qorunması məsələlərinə xüsusi diqqət yetirərək, özünün ilk ağıllı eynəklərinin buraxılışını təxirə salır.

Qaziler.az xəbər verir ki, bu barədə "Engadget" nəşri məlumat yayıb.

Məlumata görə, şirkətin "Vision" və digər bölmələrində bu cihaz üzərində işləyən komandalar məxfiliyi layihənin əsas prioriteti hesab edirlər. Məhz bununla bağlı məsələlərin həlli zərurəti cihazın bazara çıxma müddətinin təxirə salınmasının əsas səbəblərindən biri olub.

Şirkət hazırda "Apple"ın mövcud məhsullarının heç birində olmayan bir sıra yeni aparat və proqram təhlükəsizlik funksiyaları üzərində işləyir.

Xüsusilə, gizli çəkilişlərin qarşısını alan mexanizmlər nəzərdən keçirilir. Variantlardan biri budur ki, əgər sistem istifadəçinin kameranın işlədiyini göstərən işıq indikatorunu sıradan çıxarmağa çalışdığını təsbit edərsə, çəkiliş avtomatik olaraq dayanacaq. Analoji yanaşma artıq "Meta"nın ağıllı eynəklərində tətbiq olunur.

"Apple" həmçinin cihazın daha sadələşdirilmiş versiyalarının buraxılmasını da müzakirə edir.

Variantlardan biri daxili kameradan tamamilə imtina edilməsini nəzərdə tutur. Digər ssenariyə görə isə, eynəklər tam funksional kamera sisteminə sahib ola bilər, lakin istifadəçilər ondan foto və video çəkiliş üçün istifadə edə bilməyəcəklər. Bu cür həllər ətrafdakı insanların məxfiliyinin pozulması ilə bağlı yarana biləcək narahatlıqları azaltmaq məqsədi daşıyır.

İlk olaraq "Apple"ın öz ağıllı eynəklərini artıq bu il təqdim edəcəyi gözlənilirdi. Lakin media orqanlarının məlumatına görə, şirkət hazırlanma qrafikini dəyişib.

İndi cihazın təqdimatı "WWDC 2027" konfransında gözlənilir, satışların başlanması isə 2027-ci ilin sonuna yaxın baş tuta bilər.

QAZİLER.AZ