Konqo Demokratik Respublikasında işləyərkən Ebola qızdırmasına yoluxan daha bir ABŞ vətəndaşı Almaniyaya gətirilib.

Qaziler.az xəbər verir ki, bu barədə DPA agentliyi məlumat yayıb.

Agentliyin məlumatına görə, pasiyent ötən gecə Frankfurt-Mayn Universitet Klinikasına çatdırılıb. Bundan əvvəl ABŞ rəsmiləri bəyan etmişdilər ki, xəstələnən şəxs KDR-də fəaliyyət göstərən humanitar təşkilatlardan birinin əməkdaşıdır. Onda Ebola virusunun ştammlarından biri olan Bundibuciyo (Bundibugyo) virusu aşkar edilib.

Bu, KDR-də Ebolaya yoluxduqdan sonra Almaniyada müalicə alan artıq ikinci amerikalıdır. Daha əvvəl Berlinin "Şarite"  klinikasında amerikalı həkim müalicə olunub və o, iyunun 6-da qənaətbəxş vəziyyətdə evə buraxılıb.

Rəsmi olaraq mayın 15-də Konqo Demokratik Respublikası və qonşu Uqandada Ebola qızdırmasının baş qaldırdığı elan edilib. Afrika İttifaqının Səhiyyə Xidmətinin məlumatına görə, hazırkı epidemiya virusun 1976-cı ildə aşkar edilməsindən bəri miqyasına və ağırlığına görə dördüncü ən böyük epidemiyaya çevrilib.

QAZİLER.AZ