İran ətrafındakı münaqişə NATO daxilindəki ixtilafları gücləndirir, çünki bir çox avropalı müttəfiqlər alyansın ABŞ tərəfindən mümkün hərbi müdaxiləsini dəstəkləməyə hazır deyillər.

Qaziler.az “RİA Novosti”yə istinadla xəbər verir ki, bunu Avropadakı mənbə bildirib.

Agentliyin həmsöhbətinin sözlərinə görə, NATO üzvləri İrandakı münaqişənin nizamlanmasında diplomatik yanaşmaya üstünlük verirlər. Mənbə vurğulayıb ki, Böyük Britaniya, Polşa və Baltikyanı ölkələr üçün Rusiya-Ukrayna münaqişəsi daha vacib və prioritet olaraq qalır.

"ABŞ-İran münaqişəsi NATO-nu bölür, çünki alyansın bir çox avropalı üzvləri İranla qarşıdurmaya girməkdən və Hörmüz boğazındakı Amerika hərbi əməliyyatlarını birbaşa dəstəkləməkdən imtina edir, diplomatik yanaşmaya üstünlük verirlər. Bir sıra avropalı NATO üzvləri, ilk növbədə Böyük Britaniya, Polşa və Baltikyanı ölkələr üçün Rusiya-Ukrayna münaqişəsi daha vacib və prioritet olaraq qalır", - deyə agentliyin həmsöhbəti bildirib.

Qeyd edək ki, iyulun 8-də ABŞ prezidenti NATO sammiti çərçivəsində bəyan edib ki, Vaşinqtonla Tehran arasındakı atəşkəs artıq qüvvədə deyil. Zərbələr yenidən başladıqdan sonra Amerika lideri İran rəhbərliyinin ünvanına son vaxtların ən sərt çıxışlarından birini edib. O, iranlıları "xəstə insanlar" və "cəmiyyətin tullantıları" adlandırıb, həmçinin İslam Respublikasını Yaxın Şərqdə sabitlik naminə xaric edilməli olan "bədxassəli şiş" ilə müqayisə edib. Amerika lideri danışıqlarda artıq heç bir məna görmədiyini də vurğulayıb.

QAZİLER.AZ