Böyük Britaniya növbəti iki il ərzində Ukraynanın nüvə enerjisi sektorunun sabit fəaliyyətini dəstəkləmək üçün 210 milyon funt sterlinq (271 milyon dollar) ayıracaq.

"Report"un məlumatına görə, bu barədə Ukraynanın energetika naziri Denis Şmıqal "X" sosial şəbəkəsində yazıb.

"Bu razılaşma Ukrayna Prezidenti Volodimir Zelenski ilə Böyük Britaniyanın Baş naziri Kir Starmer arasında bu yaxınlarda aparılmış danışıqların davamı olub və Böyük Britaniyanın Ukraynanın enerji təhlükəsizliyinin gücləndirilməsinə dəyişməz sadiqliyini əks etdirir", - o yazıb.

Bununla yanaşı, Şmıqal qeyd edib ki, bu vəsait "Urenco Global" şirkətinin "Enerqoatom"a zənginləşdirilmiş uran tədarük etməsinə imkan verəcək ki, bu da Ukraynanın nüvə parkı üçün sabit yanacaq tədarükünü təmin etməyə kömək edəcək.

"Nüvə enerjisi Ukraynada elektrik enerjisi istehsalının yarısından çoxunu təmin etdiyi üçün bu dəstək Rusiyanın ölkənin enerji infrastrukturuna davam edən hücumları fonunda enerji sisteminin dayanıqlığı üçün kritik əhəmiyyət daşıyır", - o vurğulayıb.