Cənubi Koreya nüvə sualtı qayıqlarının hazırlanması ilə bağlı rəsmi planını təqdim edib. Plana əsasən, ilk belə gəmi növbəti onilliyin sonuna qədər istismara verilməlidir.

Qaziler.az xəbər verir ki, bu barədə “Bloomberg” agentliyi ölkənin Müdafiə Nazirliyinə istinadən məlumat yayıb.

Bu, ölkə tarixində "Çan Bo-qo – III" layihəsi çərçivəsində nüvə sualtı qayıqlarının yaradılması üzrə ilk hərtərəfli baza planıdır. Sənəd xarici texnologiya və komponentlər cəlb edilmədən sualtı qayıqların yerli sənaye bazasında tikilməsini, az zənginləşdirilmiş uran yanacağından istifadəni, həmçinin ABŞ və Beynəlxalq Atom Enerjisi Agentliyi (MAQATE) ilə koordinasiyanı nəzərdə tutur.

Cənubi Koreya Müdafiə Nazirliyinin planına görə, layihə çərçivəsində tikilən ilk sualtı qayıq 2030-cu illərin ortalarında suya buraxılacaq, onilliyin sonunda isə istismara veriləcək. Nazirlik bu təşəbbüsü Şimali Koreyanın nüvə təhdidinə cavab və gəmiqayırma, nüvə energetikası, eləcə də müdafiə sənayesini birləşdirən uzunmüddətli sənaye layihəsi kimi təqdim edib.

QAZİLER.AZ