Hindistanın Karnataka ştatında yerli safari parkında bir qadın fil tərəfindən əzilərək ölüb.

Qaziler.az bildirir ki, bu barədə "The Indian Express" qəzeti mayın 18-də məlumat yayıb.

Karnataka ştatının Kodagu rayonundakı vəhşi təbiət parkında iki filin döyüşməsi və onlardan birinin hücumuna məruz qalması nəticəsində Tamil Nadudan olan 33 yaşlı turist bazar ertəsi günü ölüb.

Qadın parka əri və uşağı ilə gəlib. Hadisə səhər saatlarında, ziyarətçilərə fillərin yemləndiyini və yuyulduğunu izləməyə icazə verilərkən baş verib. Bu müddət ərzində fillər, Kançan və Martanda arasında dava baş verib. İşçi heyətinin heyvanları sakitləşdirmək cəhdlərinə baxmayaraq, fillərdən biri tarazlığını itirərək turistlərə tərəf yıxılıb.

Qadın digər ziyarətçilərlə birlikdə qaçmağa çalışsa da, büdrəyib. Elə bu anda yıxılan fil onu əzib. Turistin əri və uşağı qaçmağı bacarıb və xəsarət almayıblar.

QAZİLER.AZ