Türkiyə prezidenti Rəcəb Tayyib Ərdoğana həm Kiyev, həm də Moskva hörmət edir. Türkiyə Rusiyanın enerji resurslarını almağı dayandırarsa, Ərdoğan Ukraynaya sülh gətirməyə qadirdir.

Qaziler.az-ın RBC-Ukraynaya istinadən məlumatına görə, bunu ABŞ prezidenti Donald Tramp Türkiyə prezidenti Ərdoğanla görüşündə deyib.

Tramp bildirib ki, Ərdoğana həm Ukrayna prezidenti Vladimir Zelenski, həm də Rusiya diktatoru Vladimir Putin hörmət edir. Bu fonda Ərdoğan “istəsə, böyük təsir gücünə malik ola bilər”.

"Putin də, Zelenski də Ərdoğana hörmət edir. Hamı Ərdoğana hörmət edir. Mən Ərdoğana həqiqətən hörmət edirəm. O, istəsə, Ukraynadakı müharibəyə böyük təsir göstərə bilərdi, lakin o, neytral olmağa üstünlük verir", - ABŞ prezidenti deyib.

Tramp Türkiyə liderini Ukrayna ilə Rusiya arasındakı münaqişədə neytral mövqe tutmasına görə tərifləyib. Bununla belə, ABŞ prezidenti əlavə edib ki, Ərdoğan Ukraynada sülhün əldə olunmasına mühüm töhfə verə bilər.

"O, (Ərdoğan) neytral olmağı xoşlayır. Mən də neytral olmağı xoşlayıram. Amma o, müdaxilə etsəydi, edə biləcəyi ən yaxşı şey Rusiyadan neft və qaz almağı dayandırmaq olardı", - Tramp deyib.

QAZİLER.AZ