İtlər tərəfindən böyüdülmüş səkkiz yaşlı uşaq Tailandın şimalında meşədə tapılıb.

Qaziler.az bildirir ki, bu barədə BILD xəbər verir.

Uttaradit əyalət hökumətinin məlumatına görə, heyvanlar uzun illər uşağın sağ qalmasına kömək edib. Bütün bu müddət ərzində o, həmişə onu orada tək qoyan anası ilə birlikdə uçuq-sökük bir daxmada yaşayıb: qadın, şiddətli narkotik asılılığından əziyyət çəkib və gün ərzində məbədlərdə dilənib.

Yerli sakinlərin xəbərlərindən sonra uşaq və yeniyetmələrin mühafizəsi xeyriyyə təşkilatı uşaqla maraqlanıb. Onun direktoru Pavina Honqsakul polislə əlaqə saxlayıb və iyunun sonunda meşədəki dayaqlar üzərindəki daxmada axtarış aparılıb. Uşaq altı itin arasında tapılıb.

Yerli sakinlərin sözlərinə görə, heç kim başqa uşaqların bu uşağa yaxınlaşmasını istəməyib. Nəticədə itlərə getdikcə daha çox yaxınlaşıb və onların davranışlarını mənimsəyib. Xilasetmə zamanı, hadisə şahidlərinin sözlərinə görə, o, özünü it kimi aparıb - hürüb və dörd ayaq üstə sürünüb.

"Danışmadı - yalnız hürdü. Bu, dəhşətli mənzərə idi", - Pavina Hongsakul təsdiqlədi.

Uşaq indi yerli uşaq evinə köçürülüb. Tailand səlahiyyətliləri ona rəsmi olaraq yalnız "A" kimi müraciət edirlər.

"Biz onu izləməyə davam edəcəyik və ehtiyacı olan hər şeyi almasını təmin etmək üçün əlimizdən gələni edəcəyik. Onun yaxşı bir həyat şansı var", - Hongsakul söz verib.

QAZİLER.AZ