Zimbabve Vəhşi Təbiət İdarəsi heyvanların sayının sürətlə artmasının təsirini azaltmaq məqsədilə onlarla fili məhv etmək və onların ətini istehlakçılara paylamaq niyyətində olduğunu açıqlayıb.

Qaziler.az xəbər verir ki, bu barədə “Phys.org” “Agence France-Presse”ə (AFP) istinadən məlumat yayıb.

Zimbabve Botsvanadan sonra fillərin ən çox yaşadığı dünyanın ikinci ölkəsidir.

Dövlət Parklar və Vəhşi Təbiət İdarəsi (ZimParks) verdiyi açıqlamada, ilkin məhvin ölkənin cənub-şərqindəki “Save Valley Conservancy”də yaşayan 50 filə aid ediləcəyini bildirib. Sənəddə neçə heyvanın və hansı müddət ərzində kəsiləcəyi göstərilməyib.

“ZimParks”a görə, 2024-cü ildə havadan aparılan araşdırmada qeyd olunub ki, “Save Valley Conservancy”də 2550 fil yaşayır. Bu da saxlanılacaq 800 filin tutumundan üç dəfə çoxdur. Onlardan ən azı 200-ü son beş ildə başqa parklara köçürülüb.

“Fillərin məhvi zamanı əldə edilən ət yerli icmalara paylanacaq, fil sümüyü isə dövlət mülkiyyətinə keçəcək və saxlanmaq üçün “ZimParks”a təhvil veriləcək", - məlumatda vurğulanıb.

QAZİLER.AZ