Almaniyanın Köln şəhərində İkinci Dünya Müharibəsindən qalma üç partlamamış bombanın aşkarlanmasından sonra 20 mindən çox insan müvəqqəti olaraq evlərini və iş yerlərini tərk edəcək.

Qaziler.az xəbər verir ki, bu barədə “Bild”ə şəhər administrasiyasından məlumat verilib.

Mənbənin sözlərinə görə, partlayıcı tapıntılar bazar ertəsi, iyunun 2-də Doyç ərazisində torpaq tədqiqatı zamanı aşkar edilib. Hakimiyyət orqanlarının dəqiqləşdirdiyi kimi, təxliyə çərşənbə günü - sursatların zərərsizləşdirilməsi əməliyyatı başlamazdan əvvəl baş tutacaq.

Müvəqqəti evakuasiya Altştadt və Doyç bölgələrində yaşayan sakinlər və müəssisələrin işçiləri, həmçinin yerli otellərin qonaqları, ümumilikdə 20,5 minə yaxın insanı əhatə edib. Təxliyə zonasına RTL televiziya və radio şirkətinin binası, qatar stansiyası, Köln meriyası, xəstəxana, iki qocalar evi, bir neçə məktəb və uşaq bağçası daxildir.

Əməliyyatla əlaqədar olaraq Reyn çayı üzərindəki üç körpüdə nəqliyyatın hərəkəti müvəqqəti olaraq bağlanacaq. Lakin Köln Katedralı evakuasiya zonasına daxil edilməyib.

QAZİLER.AZ