Jeleznoqorsk şəhər məhkəməsi onu övladlığa götürən anasını qətlə yetirməkdə təqsirli bilinən 16 yaşlı yeniyetməni islah koloniyasında 3 il 6 ay müddətinə azadlıqdan məhrum edib.

Qaziler.az xəbər verir ki, bu barədə Krasnoyarsk diyarı prokurorluğunun mətbuat xidməti məlumat yayıb. Qətlin səbəbi qadının spirtli içki qəbul etməsinə əsaslanan şəxsi düşmənçilik olub.

Məhkəmə müəyyən edib ki, 2024-cü ilin oktyabrında məktəbli ilə onun 54 yaşlı qəyyumu arasında məişət zəminində münaqişə baş verib, bu zaman yeniyetmə mətbəx bıçağını götürərək qadının boynuna iki bıçaq zərbəsi vurub. Qadın aldığı xəsarətlərdən yerindəcə keçinib. Bundan sonra yeniyetmə uzanıb yatıb və səhər saatlarında məktəbə gedib.

Meyiti mərhumun qonşu otaqda olan 86 yaşlı anası aşkar edib. O, polisə zəng edib. İstintaqın məlumatına görə, müttəhim dəfələrlə yaşıdlarına qarşı aqressivlik nümayiş etdirib. Məhkəmə zamanı o, ifadə verməkdən imtina edib və son ifadəsində isə “Mən peşmanam” deyib.

Yeniyetmə həbslə yanaşı, tibbi xarakterli məcburi tədbirlərə də məhkum edilib. Bundan başqa, profilaktika qurumlarının əməkdaşları da cəzalandırılıb.

QAZİLER.AZ