ABŞ-ın Klivlend şəhərində 16 yaşlı yeniyetmə bir ailəni yanğından xilas edib və qəhrəman kimi tanınıb.

Qaziler.az bildirir ki, bu barədə "Cleveland 19 News" yazır.

Şəhərin yanğınsöndürmə idarəsinə bu gün səhər saatlarında iki evin yanması və Sakramento prospektində elektrik xəttinin kəsilməsi barədə məlumat daxil olub. Yanğınsöndürənlər çağırışa yollanarkən Tayler Souden adlı gənc yanğını görüb. O, qonşularının qışqırtısını eşidib və yanan evin damında iki uşaqlı ananı görüb. Qadının üçüncü uşağı ikinci mərtəbədən özünü ataraq yanğından xilas olub.

Yeniyetmə heç düşünmədən nərdivanı götürüb və ailəni xilas etmək üçün qaçıb. O, damın üstünə çıxıb, uşaqları yerə sala bilib və analarına kömək edib. Ailə üzvlərindən heç biri xəsarət almayıb.

Soudenin ögey atası onu başqalarının həyatını öz həyatından üstün tutduğuna və təhlükə ilə üzləşməkdən qorxmadığına görə tərifləyib.

QAZİLER.AZ