Rusiya prezidenti Vladimir Putin yayın ortalarına qədər Nazirlər Kabinetindən və hüquq-mühafizə orqanlarından telefon fırıldaqçılarına qarşı mübarizə mexanizmi haqqında hesabat gözləyir.

Qaziler.az “Gazeta.ru”ya istinadla xəbər verir ki, bu barədə Kremlin mətbuat xidməti məlumat yayıb. Qeyd olunub ki, Rusiya lideri mart ayında Nazirlər Kabinetində keçirilən müşavirənin yekunlarına dair sərəncam imzalayıb.

Sərəncama əsasən, Rusiya hökumətinə Mərkəzi Bank, İstintaq Komitəsi, Daxili İşlər Nazirliyi və Federal Təhlükəsizlik Xidməti ilə birlikdə telefon və internet fırıldaqçılığı ilə mübarizə sahəsində vahid mexanizmin formalaşdırılması üçün təkliflər hazırlayıb təqdim etmək tapşırılıb.

Putin həmçinin departamentlərə fırıldaqçılardan gələn zəngləri bloklamaq üçün mexanizm yaratmağı da tapşırıb. Bundan başqa, dövlət başçısının tapşırığına əsasən, rabitə operatorları şübhəli zəng və ya SMS qeydə alındıqda fırıldaqçılar barədə banklara operativ məlumat verməli olacaqlar.

QAZİLER.AZ