ABŞ prezidenti Donald Trampın İranla yeni nüvə sazişi üzrə birbaşa danışıqlar aparmaq təklifinə Tehran tərəfi nəhayət cavab verib. Musavat.com xarici mediaya istinadla xəbər verir ki, İran Xarici İşlər Nazirliyi martın 27-də bəyan edib ki, rəsmi cavab Oman vasitəsilə Vaşinqtona çatdırılıb.
İranın xarici işlər naziri Abbas Əraqçının sözlərinə görə, Tehran “təmkinli” tonla yazılmış yazılı cavabında Tramp administrasiyasına bildirib ki, ABŞ-ın “maksimum təzyiq” siyasəti qüvvədə olduğu müddətcə birbaşa danışıqlar mümkün deyil.
QAZİLER.AZ Musavat.com-a istinadən bildirir ki, Trampın məktubu ilk dəfə martın 12-də Birləşmiş Ərəb Əmirlikləri rəsmiləri vasitəsilə İrana çatdırılmışdı. İran isə cavab məktubunu Oman üzərindən göndərməyi seçib. Ekspertlərin fikrincə, bu gediş Tehranın BƏƏ və İsrail arasında yaxınlaşmadan narahatlığının göstəricisidir.
Məktubda Trampın İranın nüvə proqramı ilə bağlı birbaşa danışıqlar təklif etdiyi və razılıq əldə olunmadığı halda “ciddi nəticələr” barədə xəbərdarlıq etdiyi bildirilir. Vaşinqtonun İranın nüvə obyektlərinə qarşı hava zərbələrini istisna etmədiyi də qeyd olunur.
İranın ali dini lideri Əli Xameneinin müşaviri Əli Şəmxani deyib ki, Tehran dolayı danışıqlara açıqdır, lakin bunun üçün “bərabər əsaslı və qarşılıqlı hörmətə əsaslanan şərtlər” olmalıdır.
“İran birbaşa danışıqlar aparmasa da, dolayı təmaslara açıqdır və bərabər əsasda aparılacaq müzakirələr üçün əlavə addımlar atmağa hazırdır”, – deyə Şəmxani bildirib.
Beynəlxalq Böhran Qrupunun İran proqramı direktoru Əli Vaezi bu mövqeyin Tramp administrasiyası tərəfindən yaxşı qarşılanmayacağını deyir:
“Tramp dolayı kanallarla maraqlanmır. Onun üçün görüntü və birbaşa diplomatik şou önəmlidir. Bu diplomatiya indiki administrasiya ilə işləmir.”
İranın Almaniyadakı keçmiş səfiri Hüseyn Musəvian isə fərqli düşünür. O, sosial şəbəkədə yazıb ki, İranın cavabı qeyri-müəyyən olsa da, Trampın məktubundakı bütün əsas məsələlərə toxunulub.
Tehran bəyan edir ki, nüvə proqramı tamamilə dinc məqsədlidir. Lakin İran daxilindəki bəzi sərt mövqeli qüvvələr bu proqramın silaha çevrilməsi ideyasını gündəmdə saxlamağa davam edir.
Donald Tramp ilk prezidentlik dövründə ABŞ-ı 2015-ci il nüvə sazişindən çıxarmış, İrana qarşı sərt sanksiyalar tətbiq etmişdi. İran isə indi bildirir ki, yalnız bu sanksiyalar ləğv olunacağı təqdirdə danışıqlara hazır olacaq, lakin raket proqramı və regiondakı fəaliyyətlər məsələsində heç bir güzəştə getməyəcək.
