Kanada parlamenti Ukraynaya hərbi yardım üçün 764 milyon Kanada dolları (təxminən 587 milyon ABŞ dolları) ayırmağa qərar verib.

Qaziler.az bildirir ki, bu barədə “Ukrinform” məlumat yayıb.

Qeyd edilir ki, bu məbləğ müxtəlif məqsədlər, o cümlədən milli müdafiənin gücləndirilməsi üçün 21 milyard Kanada dolları (təxminən 14,4 milyard ABŞ dolları) daxil olmaqla əlavə xərclər paketinin bir hissəsidir.

Kanadanın müdafiə naziri Bill Bleyr aydınlaşdırıb ki, vəsait Ukraynanın qələbəsini təmin etmək üçün sursat, Ukrayna hərbçilərinin təlimi və digər zəruri vasitələrə sərf olunacaq.

Sənəd hərbi dəstəkdən əlavə, BVF-nin xüsusi hesabı vasitəsilə Ukraynaya 400 milyon Kanada dolları (307 milyon ABŞ dolları) və humanitar minatəmizləmə və kibertəhlükəsizliyin gücləndirilməsi üçün 45 milyon Kanada dolları (35 milyon ABŞ dolları) maliyyə yardımını nəzərdə tutur.

Qeyd edək ki, müxalifətdə olan Mühafizəkarlar Partiyası bu qərarın əleyhinə səs verib, hakimiyyət dəyişikliyində israr edib. Buna baxmayaraq, qanunla icazə verilən son gündə büdcə xərcləri təsdiq edilib.

Bildirilir ki, indi qərarın yaxın vaxtlarda Kanada Senatında səsə qoyulması gözlənilir.

QAZİLER.AZ