Son beş ildə kəskin ərzaq qıtlığı yaşayan insanların sayı demək olar ki, üç dəfə artıb.

QAZÍLER.AZ  Trend-e istinaden xəbər verir ki, bunu Ümumdünya Ərzaq Proqramının (ÜƏP) Qlobal Ofisinin direktoru Martin Frik COP29 çərçivəsində Parlamentlərarası İttifaqın (PAİ) və Azərbaycan Respublikasının Milli Məclisinin birgə təşkilatçılığı ilə keçirilən Parlament Görüşü çərçivəsində “Dəyişən iqlim şəraitində sağlamlığın və ərzaq təhlükəsizliyinin qorunması tədbirləri” sessiyası zamanı deyib.

"Son beş ildə kəskin ərzaq çatışmazlığı yaşayan insanların sayı 135 milyondan 320 milyona yüksəlib. Bu, təxminən üç dəfə artım, xüsusilə də İkinci Dünya Müharibəsindən sonra aclıq nisbətlərinin tədricən azaldığını nəzərə alsaq, heyrətləndirici və şokedici bir reallıqdır. Dünya əhalisi sürətlə artırdı, lakin ac insanların mütləq sayı 2015-ci ilə qədər azalırdı", - deyə o bildirib.

M.Frik qeyd edib ki, əvvəlcə durğunluq olub, indi isə ac insanların sayında daim artım var. Bu artımın üç əsas səbəbi var: münaqişə, iqlim dəyişikliyi və iqtisadi qarışıqlıq.

"Münaqişələr təkcə onlardan birbaşa təsirlənən insanlara deyil, bütün dünyaya dağıdıcı təsir göstərir, şok dalğaları yaradır və qlobal nəticələrə gətirib çıxarır", - deyə o bildirib.

Qeyd edək ki, tədbirdə Parlamentlərarası İttifaqının (IPU) Azərbaycandan vitse-prezidenti, Milli Məclisin deputatı Sevil Mikayılova da iştirak edir.

Xatırladaq ki, ötən gün Bakıda COP29 çərçivəsində Parlamentlərarası İttifaq və Azərbaycan Milli Məclisinin birgə təşkilatçılığı ilə Parlament Görüşü öz işinə başlayıb. Tədbirdə Parlamentlərarası İttifaqın prezidenti Tulia Akson, Azərbaycan Milli Məclisinin sədri Sahibə Qafarova, həmçinin Parlamentlərarası İttifaqın Azərbaycandan vitse-prezidenti, Milli Məclisin deputatı Sevil Mikayılova iştirak ediblər.

İki günlük tədbirdə 66 ölkədən və beynəlxalq təşkilatlardan 92 nümayəndə heyətinin, 330-dək iştirakçının qatılacağı tədbirdə 12 spiker və vitse-spiker başda olmaqla, 167 parlament üzvü iştirak edir.