Almaniya kansleri Olaf Şolts və Rusiya Prezidenti Vladimir Putin cümə günü telefon danışığına hazırlaşır. Bu zəng, demək olar ki, iki il ərzində liderlər arasında ilk birbaşa təmas olacaq və Ukrayna üçün kritik məqamda baş tutacaq.

Qaziler.az bildirir ki, bu barədə Bloomberg xəbər verir.

Nəşr yazır ki, Ukrayna müharibə şəraitində üçüncü qışa hazırlaşır, onun enerji infrastrukturu məhv edilir və Qərb müttəfiqlərinin dəstəyi qeyri-müəyyənləşir. Ukraynanın ABŞ-dan sonra ikinci ən böyük tərəfdaşı olan Almaniya artıq milyardlarla avro yardım vəd edib.

Bu arada Avropa liderləri ABŞ-da gözlənilən siyasi dəyişikliklərdən narahatdırlar. Avropa rəsmilərinin fikrincə, Ağ Evə qayıtmağa hazırlaşan Donald Tramp ola bilsin ki, Rusiyanın ərazi qazanclarını möhkəmləndirə biləcək və o, Kiyev və Moskva arasında tez razılaşma əldə etmək niyyətində olduğunu açıqlayıb.

"Avropa liderləri həmçinin ABŞ-ı Rusiyaya qarşı sanksiyaları sərtləşdirməyə və Moskvanın silah istehsalında istifadə etdiyi texnologiyanın tədarükünü kəsməyə çağırır", - nəşr yazır.

Qeyd edək ki, Almaniya kansleri Olaf Şoltsla Vladimir Putin arasında sonuncu telefon danışığı 2022-ci ilin dekabrında baş tutub. O vaxtdan bəri Putinin digər Qərb liderləri ilə birbaşa əlaqələri də dayandırılıb. Co Bayden və Emmanuel Makron sonuncu dəfə elə həmin il Rusiya lideri ilə danışıb.

Almaniya hökumətinin sözçüsü Şteffen Gebeştrayt daha əvvəl demişdi ki, kansler bunun konkret nəticələrə gətirib çıxara biləcəyinə inanarsa, Putinlə dialoqu bərpa etməyə hazırdır.

QAZİLER.AZ