ABŞ Avropadakı 6 aylıq əməliyyat çərçivəsində özünün 12 ədəd “Fairchild-Republic A-10 Thunderbolt II” hücum təyyarəsini Almaniyaya göndərib. APA-nın “International Business Times” nəşrinə (Avstraliya) istinadən verdiyi məlumata görə, bu əməliyyat ABŞ-ın dini radikalizmin artması və Rusiya təcavüzü ilə bağlı artan narahatlığı ilə əlaqədardır.

“A-10 Thunderbolt” təyyarələrinin Avropaya uçuşunda məqsəd Vaşinqtonun NATO üzrə müttəfiqlərinin narahatlığını aradan qaldırmaq və Rusiyaya ABŞ Silahlı Qüvvələrinin yaxınlıqda olmasına dair siqnal göndərməkdir. ABŞ-ın 3-cü Hərbi Hava Qüvvələrinin komandanı, general Derril Robertson bildirib ki, hücum təyyarələrinin Avropaya göndərilməsi havada üstünlüyün yeni nümayişidir və “İŞİD”, Rusiya kimi müasir təhlükələrə qarşı görülən tədbirlər çərçivəsində həyata keçirilib.