Rusiya prezidenti Vladimir Putin həmkarı Uxnaaqiyn Xurelsuxun dəvəti ilə Monqolustana rəsmi səfərə gedib.  

Qaziler.az xəbər verir ki, Kremlin mətbuat xidmətinin məlumatına görə Putinin Monqolustanda qarşılanmasının görüntüləri yayılıb.

Məlumatda qeyd olunub ki, Rusiya liderinin təyyarəsi artıq Ulan-Bator hava limanına eniş edib və burada onu fəxri qarovul dəstəsi qarşılayıb. Yayımlanan videoda Putinin təyyarədən endiyi və daha sonra Monqolustan nümayəndələri ilə salamlaşdığı görünür.

“Monqolustan Prezidenti Uxnaaqiyn Xurelsuxanın dəvəti ilə Vladimir Putin Sovet və Monqolustan silahlı qüvvələrinin Xalxin-Qolda yapon militaristləri üzərində birgə qələbəsinin 85-ci ildönümünə həsr olunmuş təntənəli tədbirlərdə iştirak etmək üçün Monqolustana rəsmi səfərə gəlib”, - məlumatda bildirilib.

Monqolustana səfəri çərçivəsində Putin və Xurelsux ikitərəfli danışıqlar aparacaqları bildirilib. Həmçinin bir sıra ikitərəfli sənədlərin imzalanması planlaşdırılır. Bundan əlavə, Rusiya lideri parlamentin sədri və ölkənin baş naziri ilə də görüşəcək.

QAZİLER.AZ