“Beynəlxalq Ədalət Məhkəməsinin İsrailin Fələstin ərazilərində məskunlaşma fəaliyyətini ilhaq kimi tanımasından sonra bütün ölkələr və Birləşmiş Millətlər Təşkilatı İsraillə münasibətlərinə yenidən baxmalıdır”.

Qaziler.az TASS-a istinadla xəbər verir ki, bunu Fələstin prezidentinin beynəlxalq əlaqələr üzrə xüsusi nümayəndəsi Riyad əl-Maliki bildirib. O, xüsusilə Təl-Əvivə yardımı və onu silahla təmin etməyi dayandırmağı tələb edib.

“İndi bütün dövlətlər öz öhdəliklərinə ciddi şəkildə əməl etməlidirlər. Bu o deməkdir ki, bütün ölkələr və BMT İsraillə ikitərəfli münasibətlərini dərhal nəzərdən keçirməlidir ki, onların siyasətləri İsrailin birbaşa və ya dolayısı ilə Fələstin xalqına qarşı davam edən təcavüzünə töhfə verməsin”, - Riyad əl-Maliki deyib.

Onun sözlərinə görə, indi dünya birliyi İsrailə “nə kömək, nə yardım, nə şəriklik, nə pul, nə silah, nə ticarət - heç nə” verməməlidir.

"Beynəlxalq hüquqa əsasən, BMT-yə üzv olan bütün dövlətlər İsrail dövlətinin Fələstin ərazilərində mövcudluğuna son qoymağa borcludurlar. Bunu nə az, nə çox beynəlxalq hüquq tələb edir”, - deyə o vurğulayıb.

QAZİLER.AZ