Pentaqon Türkiyədəki "İncirlik" hərbi bazasında 12 ədəd "A-10" tipli qırıcı yerləşdirib. APA TV-nin xəbərinə görə, bunu Pentaqonun yüksək rütbəli zabitlərindən biri bildirib.

Həmin təyyarələrdən ABŞ-ın İraqdakı hərbi əməliyyatlarında istifadə olunacağı güman edilir: "Türkiyə NATO-nun tərəfdaşı və Birləşmiş Ştatların yaxın dostu, eyni zamanda koalisiya qüvvələrinin tərkibindəki önəmli dövlətlərdən biridir".

Hərbi dairələrdə "tank qatili" kimi tanınan bu qırıcılar yerüstü hərbi əməliyyatlara havadan dəstək verilməsi məqsədilə istifadə olunacaq. "A-10" tipli bu qırıcılardan daha öncə I və II Körfəz müharibələrində geniş istifadə olunub. O zaman mərmilərin zərər vurmasına rəğmən, həmin qırıcılar döyüş tapşırığını uğurla yerinə yetirərək, təyinat yerinə geri qayıtmaları ilə tanınıb.