NASA Yerin işıqlı tərəfinin fotolarının real rejimdə yerləşdirildiyi sayt hazırlayaraq istifadəyə verib. Kosmosdan - 1,5 milyon km məsafədən çəkilən fotolar 1-2 saat intervalı ilə sayta qoyulur.

İKT.lent.az-ın xəbərinə görə, NASA “http://epic.gsfc.nasa.gov” saytında hər gün DSCOVR peykindən daxil olan 12 rəngli foto yerləşdiriləcəyini açıqlayıb.

DSCOVR peyki Yerin atmosferini və Günəş küləyini müşahidə etmək üçün 2015-ci ilin fevralında fəzaya buraxılıb. Peyk “Lagranja L1” nöqtəsində, bilavasitə Yer-Günəş xəttində elə mövqe tutub ki, daim Yerin Günəşə tərəf olan hissəsini müşahidə edir. Peykdə quraşdırılan və teleskopla təchiz edilmiş EPİC kamerası spektrin müxtəlif hissələrində - ultrabənövşəyidən infraqırmızıya yaxın rəngə qədər – fotolar seriyası çəkir. Qırmızı, yaşıl və göy kanallarda əldə edilən çəkilişlər 12 meqapiksellik kameranın çəkdiyi fotolara ekvivalent olan rəngli fotolar hazırlamaq üçün istifadə edilir.