İlk F-16 təyyarəsi bu il Ukraynaya təlim keçmiş pilotlar və texniki personalla birlikdə gəlməyə başlayacaq.

Qaziler.az bildirir ki, bu barədə RBC-Ukrayna Pentaqonun rəhbəri Lloyd Ostinin "Ramştayn" formatında görüş başlamazdan əvvəl verdiyi açıqlamaya istinadən məlumat yayıb.

Ostinin qeyd etdiyi kimi, son iki ildə Müdafiə Təmas Qrupunun üzvləri Ukraynaya 70-dən çox orta və uzaq mənzilli hava hücumundan müdafiə sistemi, eləcə də minlərlə raket verib.

“Biz 3000-dən çox zirehli texnika, o cümlədən 800-dən çox əsas döyüş tankı təqdim etdik”, - deyə Pentaqon rəhbəri bildirib.

Onun sözlərinə görə, ilk F-16 qırıcıları bu il Ukraynaya gəlməyə başlayacaq.

"Bu il Ukraynaya daha çox ianə edilmiş F-16 eskadrilyaları, bu Təmas Qrupunun üzvləri tərəfindən öyrədilmiş pilotlar və yardımçı heyətlə birlikdə gəlməyə başlayacaq", - Ostin bildirib.

Xatırladaq ki, bu gün Ukraynanın müdafiəsi üzrə Təmas Qrupunun "Ramştayn" formatında 21-ci iclası keçirilir. Müdafiə Nazirliyi qeyd edib ki, müttəfiqlər ATACMS raketləri, mərmi və digər silahların tədarükü məsələsini müzakirə edəcəklər.

QAZİLER.AZ