Yaponiya Beynəlxalq Əməkdaşlıq Agentliyi (Japan International Cooperation Agency, JICA) dörd ASEAN ölkəsi - İndoneziya, Malayziya, Filippin və Vyetnam üçün dəniz təhlükəsizliyini dəstəkləmək üçün 10 illik plan hazırlayır.

Qaziler.az bildirir ki, bu barədə izvestiya.ru yazır.

Məlumata görə, JICA-nın 2025-ci ilin martına qədər ətraflı plan təqdim edəcəyi gözlənilir. Buraya dronların, radar sistemlərinin və patrul katerlərinin tədarükü, eləcə də dörd ölkənin hər biri üçün potensialın artırılması üzrə digər tədbirlər daxildir.

Bildirilir ki, Yaponiya rəsmiləri və ekspertləri bir ay əvvəl Filippin və İndoneziyada ilkin məsləhətləşmələr aparıblar. Aprel ayında Malayziya və Vyetnama oxşar səfərlər planlaşdırılır.

Vyetnam, Malayziya, Filippin və Yaponiyanın Çinlə ərazi mübahisələri var. Yaponiya və Çin üçün Şərqi Çin dənizindəki Senkaku (Dyaoyuydao) adaları mübahisəlidir. Vyetnam, Malayziya və Filippin Cənubi Çin dənizi və adalar üzərində Çinlə mübahisəyə cəlb olunub. Çin öz ambisiyalarını hərbi mövcudluq və infrastrukturun inkişafı ilə gücləndirərək, suların əksəriyyəti üzərində suverenlik iddiasındadır. 2016-cı ildə BMT tribunalı Çinin Cənubi Çin dənizindəki iddialarının əksəriyyətinə qarşı qərar çıxarsa da, Pekin hökmü yerinə yetirməkdən imtina edib.

QAZİLER.AZ