Finlandiyanın Nammo Lapua sursat zavodu Ukraynadakı müharibə səbəbindən bu il istehsalını 5 dəfə artıracaq.

Qaziler.az bildirir ki, bu barədə Yle xəbər verir.

Artilleriya mərmiləri üçün gilizlər istehsal edən zavod ölkənin qərbində Sastamala şəhərində yerləşir.

Nammo (Nordic Ammunition Company) sursat istehsalında ixtisaslaşmış Norveç-Finlandiya birgə şirkətidir. Şirkətin səhmləri Norveçin Ticarət və Sənaye Nazirliyinə və Finlandiyanın Patria müdafiə korporasiyasına bərabər şəkildə məxsusdur.

Sastamala zavodunda istehsalın artması Ukraynadakı müharibə ilə bağlıdır, çünki artilleriya mərmiləri Finlandiyanın Ukraynaya yardımında, eləcə də əvvəllər anbarlarından Ukraynaya sursat köçürən Aİ ölkələrinin ehtiyatlarının doldurulmasında əsas rol oynayır.

Həmçinin bildirilir ki, Nammo sursat istehsalını artırmaq üçün Aİ layihəsində iştirak etmək üçün müraciət edib. Əgər uğur qazanarsa, şirkət artilleriya mərmilərinin istehsalı üçün yeni zavod tikəcək. Layihəyə Finlandiya hökumətindən də maliyyə tələb olunacaq.

QAZİLER,AZ