Stokholmda Nobel həftəsi başlayır. İlk olaraq fiziologiya və tibb sahəsində laureatın adı elan ediləcək.

AZƏRTAC xəbər verir ki, yaxın günlərdə digər nominasiyalarda da namizədlərin adları açıqlanacaq. Oktyabrın 6-da fizika, oktyabrın 7-də kimya üzrə laureatlar, oktyabrın 9-da isə Nobel sülh mükafatına namizədlər elan ediləcək. İqtisadiyyat sahəsində Nobel laureatının adı isə oktyabrın 12-si məlum olacaq. Nobel komitəsi hələlik ədəbiyyat üzrə namizədin hansı gün elan ediləcəyini bildirməyib.

1901-ci ildən indiyədək Nobel mükafatı 567 dəfə təqdim olunub. 865 nəfər və 25 təşkilat bu mükafata layiq görülüb. Mükafatın məbləği həmişə olduğu kimi 8 milyon İsveç kronudur. Lakin bu il İsveç valyutasının zəifləməsi səbəbindən 2001-ci ildən indiyədək ilk dəfə mükafat 950 min dollar təşkil edəcək.