Moskva Fələstin-İsrail münaqişəsi zonasında vəziyyətin kəskin şəkildə pisləşməsi ilə bağlı ən ciddi narahatlığını ifadə edir. Bununla əlaqədar, 75 ildir davam edən bu münaqişənin heç bir güc yolu ilə həlli olmadığı və müstəsna olaraq siyasi-diplomatik vasitələrlə, tam hüquqlu danışıqlar prosesinin yaradılması yolu ilə həll oluna biləcəyi barədə prinsipial və ardıcıl mövqeyimizi təsdiq edirik". APA-nın Moskva müxbiri xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarovanın adından yayılan bəyanatda bildirilib.

Qeyd olunub ki, bu münaqişə 1967-ci il sərhədləri daxilində paytaxtı Şərqi Qüds olan, İsraillə sülh və təhlükəsizlik şəraitində yaşayan müstəqil Fələstin dövlətinin yaradılmasını nəzərdə tutan tanınmış beynəlxalq hüquqi əsasda tamformatlı danışıqlar prosesinin qurulması yolu ilə həll olunmalıdır

"Biz vəziyyətin indiki genişmiqyaslı eskalasiyasını BMT və onun Təhlükəsizlik Şurasının müvafiq qətnamələrinə xroniki şəkildə əməl edilməməsinin və Rusiya, ABŞ, Aİ və BMT-dən ibarət beynəlxalq vasitəçilərin Yaxın Şərq “dördlüyü”nün işinin faktiki olaraq qərb tərəfindən bloklanmasının bilavasitə nəticəsi olan zorakılığın "qapalı dairəsi"nin növbəti son dərəcə təhlükəli təzahürü kimi qiymətləndiririk.

Biz Fələstin və İsrail tərəflərini dərhal atəşkəsə, zorakılıqdan əl çəkməyə, lazımi təmkin nümayiş etdirməyə və beynəlxalq ictimaiyyətin köməyi ilə Yaxın Şərqdə hərtərəfli, davamlı və çoxdan gözlənilən sülhün bərqərar edilməsinə yönəlmiş danışıqlar prosesinin qurulmasına çağırırıq",deyə bəyanatda qeyd olunub.