İsveçrə federal prokurorları Özbəkistanın keçmiş prezidentinin qızı Gülnarə Kərimovaya qarşı ittiham irəli sürüblər. O, rüşvət almaqda və “Ofis” kimi tanınan cinayətkar təşkilatı idarə etməkdə ittiham olunur.

Qaziler.az bildirir ki, bu barədə RBC-Ukrayna “Reuters”ə istinadən xəbər verir.

Kərimova telekommunikasiya şirkətlərindən yüz milyonlarla dollar rüşvətlə nəticələndiyi iddia edilən əməliyyata rəhbərlik etməkdə ittiham olunur.

İttihamda deyilir ki, Özbəkistanın telekommunikasiya sektorunda işləmək istəyən xarici şirkətlər prezidentin qızı və Özbəkistan dövlət məmuru kimi ikili statusundan sui-istifadə edən Kərimovaya rüşvət verməli olub, bu da ona qeyri-məhdud təsir imkanları yaradıb.

Kərimova və digər təqsirləndirilən şəxsə qarşı məhkəmə prosesi çərçivəsində 480 milyon dollardan çox əmlaka həbs qoyulub.

Prokurorlar bildiriblər ki, pul İsveçrənin bank hesablarına düşməzdən əvvəl başqa ölkələrdəki bank hesabları vasitəsilə köçürülüb.

Prokurorluq əlavə edib ki, Kərimova 2001-ci ildən 2013-cü ilə qədər onlarla insanın və çoxlu sayda şirkətin daxil olduğu “Ofis” kimi tanınan cinayətkar təşkilata rəhbərlik edib. Onlar cinayətkar fəaliyyətlərini peşəkar biznes kimi həyata keçirib, zorakılıq və hədə-qorxulara da əl atıblar.

QAZİLER.AZ