Dünya şöhrətli italiyalı müğənni Toto Kutunyo 80 yaşında vəfat edib.

Qaziler.az bildirir ki, bu barədə avqustun 22-də ANSA agentliyi məlumat yayıb.

İfaçının meneceri Danilo Mancusonun sözlərinə görə, Kutunyo "son bir neçə aydır mübarizə apardığı uzun sürən xəstəlikdən sonra" vəfat edib.

İfaçı özünü çox pis hiss etməyə başlayıb və Milanda yerləşən San Raffaele xəstəxanasına yerləşdirilib. Lakin həkimlər onun həyatını xilas edə bilməyiblər.

Məşhur italyan ifaçısı Azərbaycanda pərəstişkarları tərəfindən yaxşı tanınır və sevilirdi. Onun "L'Italiano" ("İtalyan") və "Buonanotte" ("Gecəniz xeyir") mahnıları əsl hit olub.

Əsl adı Salvatore Kutunyo olan italyan müğənni və bəstəkar Adriano Çelentano, Joe Dassin, Dalida, Ricchi e Poveri kimi müğənnilərlə işbirliyi ilə tanınır. O, "L'italiano" mahnısı ilə məşhurlaşıb.

1980-ci ildə o, "Solo noi" mahnısı ilə məşhur Sanremo musiqi müsabiqəsinin, 1990-cı ildə Zaqrebdə keçirilən Eurovision Mahnı Müsabiqəsinin qalibi olub.

Toto Kutunyo 1943-cü il, iyulun 7-də İtaliyanın Fozdinovo şəhərində doğulub.

QAZİLER.AZ