İyul tarixdə qeydə alınmış ən isti ay olacaq.
Apa AFP-yə istinadən xəbər verir ki, bunu BMT-nin Dünya Meteorologiya Təşkilatı və Avropanın Kopernik İqlim Dəyişikliyi Xidməti (C3S) bildirib.
Yayımlanan hesabatda təsdiqlənib ki, iyulun ilk üç həftəsi indiyə qədər qeydə alınmış ən isti üç həftəlik dövr olub və iyul ayı indiyə qədər qeydə alınmış ən isti ay olmaq yolundadır.
Ayın ilk üç həftəsi Şimali Amerika, Asiya və Avropanın böyük hissələrində isti dalğaları ilə yadda qalıb və bu, Kanada və Yunanıstan da daxil olmaqla müxtəlif ölkələrdə meşə yanğınlarına səbəb olub, insanların sağlamlığına, ətraf mühitə və iqtisadiyyata böyük təsir göstərib.
BMT-nin baş katibi Antonio Quterreş hesabata münasibət bildirib: "İqlim dəyişikliyi buradadır. Bu, dəhşətlidir. Bu, hələ başlanğıcdır".
Quterreş deyib ki, bugünkü hesabat üçün ayın sonunu gözləməyə ehtiyac yoxdur.
"2023-cü ilin iyulu bütün dünya rekordlarını qıracaq. Qlobal qaynama dövrü gəldi", - deyə BMT Baş katibi bildirib.
C3S-in direktoru Karlo Buontempo deyib ki, 1940-cı illərə aid statistika ilə müqayisədə indi temperatur əhəmiyyətli dərəcədə artıb. "Rekordlar qıran temperaturlar qlobal temperaturun kəskin artması tendensiyasının bir hissəsidir. Antropogen emissiyalar son nəticədə bu yüksələn temperaturun əsas hərəkətvericisidir", - o deyib.
Ümumdünya Meteorologiya Təşkilatının Baş katibi Prof. Petteri Taalas isə bunun sərt reallıq olduğunu deyib: "İyul ayında milyonlarla insana təsir edən ekstremal hava, təəssüf ki, iqlim dəyişikliyinin sərt reallığı və gələcəyin proqnozudur. İstixana qazlarının emissiyalarının azaldılması zərurəti daha aktualdır".
