Fransa Suriyadakı İŞİD hədəflərinə qarşı ilk hava hücumunu gerçəkləşdirib. APA TV-nin məlumatına görə, Fransa prezidenti Fransua Olland bildirib ki, növbəti həftələrdə də hərbi əməliyyatlar davam edəcək. O vurğulayıb ki, Suriyadakı hazırkı vəziyyətin düzəlməsi üçün Bəşər Əsədsiz bir siyasi ortam yaradılmalıdır.

Fransanın Müdafiə Nazirliyinin yaydığı məlumatda deyilir ki, Hərbi Hava Qüvvələri Suriyanın İraq sərhədinə yaxın Deyrizor qəsəbəsini hədəfə alıb.

ABŞ prezidenti Barak Obama ilə görüşəcək olan Rusiya prezidenti Vladimir Putin isə rəsmi Vaşinqtonun Suriyadakı müxalifləri dəstəkləməsini tam qanunsuz hesab etdiyini açıqlayıb. Putin bildirib ki, terrora qarşı vuruşan Bəşər Əsədin beynəlxalq dəstəyə ehtiyacı var.