“Rusiya daxilində qiyama hazırlıq görülür”.

"Report" xəbər verir ki, bunu Rusiya Prezidenti Vladimir Putin xalqa müraciətində deyib.

Onun sözlərinə görə, ordu komandirləri ilə gecə əlaqə saxlayıb.

“Bizi zəiflədə bilən hər şeyə qarşı mübarizə aparmalıyıq. Qiyamçılar Rusiyanı məğlubiyyətə aparmaq istəyirlər”, - dövlət başçısı söyləyib.

O bildirib ki, üsyançılara qarşı sərt tədbirlər görülür: "Bu qiyam ölkəmizə və xalqımıza arxadan vurulan zərbədir".

V. Putinin sözlərinə görə, Rusiya bu xəyanətə sərt cavab verəcək: “Qiyamçılar cəzaya məruz qalacaqlar. Bu, qaçılmazdır”.

Dövlət başçısı ölkəni müdafiə etmək üçün hər şeyi edəcəyinə söz verib.

V.Putin söyləyib ki, Rusiya bütün çətinliklərə qalib gələcək və daha da güclənəcək.

Xatırladaq ki, “Vaqner” Xüsusi Hərbi Şirkətinin başçısı Yevgeni Priqojin bəyan edib ki, Rusiya hərbçiləri “Vaqner” muzdlu hərbi təşkilatının arxa düşərgələrinə raket zərbələri endirib, bir çox döyüşçü ölüb: "Bu vəhşiliyə necə cavab verəcəyimizə qərar verəcəyik. Növbəti addım bizimdir".

Bundan sonra Rusiya Federal Təhlükəsizlik Xidməti Yevgeni Priqojinə qarşı silahlı üsyana təhrik faktı üzrə cinayət işi açıb. Rusiya Federasiyasının Baş Prokurorluğu bildirib ki, Priqojinin əməllərinə lazımi hüquqi qiymət veriləcək. Müdafiə Nazirliyi isə “Vaqner”in arxa düşərgələrinə zərbə endirilməsi ilə bağlı iddiaları yalan məlumat adlandırıb. Nazirlik eyni zamanda “Vaqner” döyüşçülərinə müraciət edib, silahı yerə qoymağa çağırıb

Prezidentin mətbuat katibi Dmitri Peskov vurğulayıb ki, güc strukturları Rusiya prezidenti Vladimir Putinə üsyan cəhdi ilə bağlı görülən tədbirlər barədə hesabat verir.