Rusiya Dövlət Dumasında Federal Təhlükəsizlik Xidmətinin (FSB) silah tətbiqi ilə bağlı səlahiyyətlərinin genişləndirilməsini nəzərdə tutan qanun layihəsi hazırlanıb. İKT.lent.az-ın xəbərinə görə, layihəyə əsasən FSB əməkdaşlarının xarici ölkələrdə bank hesabı açmasına, sosial şəbəkələrdə və bloqlarda səhifə yaratmasına qadağa qoyulacaq.

Sənəd Dumanın oktyabr ayı üçün iş planına daxil edilib. Təhlükəsizlik üzrə komitə layihəyə oktyabrın 13-də baxacaq.

Qanun layihəsində rəhbərliyin sanksiyası olmadan kəşfiyyat əməkdaşlarının (mülki heyət də daxil olmaqla) əcnəbilərlə təmasları, xarici KİV-lə, beynəlxalq təşkilatlarla, xarici agent funksiyası yerinə yetirən qeyri-kommersiya təşkilatları ilə əlaqə saxlaması qadağan olunur. İşçilərin rəhbərliyin icazəsi olmadan sosial şəbəkələrdə, bloqlarda və digər internet resurslarında öz şəxsi məlumatlarına yerləşdirməsi də yasaqlanacaq. “Sosial şəbəkələr təhlükəlidir və əməkdaşlar haqqında məlumat bazası rolunu oynayır ki, bu da həmin şəxsin və dövlətin əleyhinə istifadə oluna bilər”, - deyə layihənin müəlliflərindən biri, Federasiya Şurasının üzvü Vladimir Cabbarov bildirib.