ABŞ Müdafiə Nazirliyinin (Pentaqon) yaxınlığında baş verən partlayışı əks etdirən süni intellektlə hazırlanmış saxta foto birjada çaxnaşmaya səbəb olub.

Qaziler.az xarici mətbuata istinadən bildirir ki, yerli vaxtla 09:30 radələrində sosial mediada, o cümlədən mavi işarə ilə təsdiqlənən bəzi Twitter hesablarında yayılan saxta foto birjada dalğalanmalara səbəb olub.

"Dow Jones"-da qısa müddət ərzində təxminən 80 bənd azalma müşahidə edilərkən günə yüzdə 0,02 artımla başlayan S&P 500 də yüzdə 0,15 azalma göstərib. Yerli vaxtla 10.11-ə olan məlumata görə, indeks yenidən müsbətə doğru dəyişib.

Pentaqonun yaxınlığındakı saxta partlayış görüntüləri ABŞ-dan kənar media tərəfindən də istifadə edilib.

Qeyd olunub ki, Hindistanın ən böyük kanallarından biri olan "Republic TV" və Rusiyanın RT xəbər agentliyi sözügedən saxta foto ilə bağlı xəbərlər dərc etsə də, qısa müddətdə müvafiq xəbərləri və sosial media paylaşımlarını geri götürüb.

Pentaqonun binasının yerləşdiyi Arlinqtonda polis və yanğınsöndürmə işçiləri ərazidə heç bir partlayış və yanğın olmadığını bildirərkən, ekspertlər sözügedən görüntünün böyük ehtimalla süni intellektlə yaradıldığını qiymətləndiriblər.

Mənbə: AA

QAZİLER.AZ