Finlandiyalı iş adamı İsmo Ryatyu Rusiya sərhədinə yaxın olan və 2015-ci ilə qədər ölkənin müdafiə qüvvələrinin təhlükəsiz obyekti kimi istifadə edilən Rankki adasını satışa çıxarıb.

Qaziler.az xarici mətbuata istinadən bildirir ki, Ryatyu turizm biznesini inkişaf etdirmək üçün 2015-ci ildə Rankki və Kirkonmaa adalarını 700 min avroya alıb, indi isə 7,9 milyon avroya satır.

"Biz bu sahəyə külli miqdarda sərmayə qoymuşuq: indi satışda 100 torpaq sahəsi var, onların hamısı rayonlaşdırılıb. Bundan əlavə, adada indi qızdırılan bütün binalarda geotermal istilik sistemi var", - sahibkar Yle-yə müsahibəsində deyib.

Sahibkar deyir ki, oğulları 30 illik ailə turizm biznesini idarə etməkdə maraqlı deyil və bu səbəbdən adaları satmaq qərarına gəlib. Bir neçə alıcı Ryatyu ilə əlaqə saxlayıb və buna görə də ilin sonuna qədər müqavilə bağlayacağını deyir.

Qeyd edək ki, Finlandiya körfəzində yerləşən Rankki adası Birinci Dünya Müharibəsi zamanı Rusiya istehkamlarının tərkibində olub, lakin 1917-ci il inqilabından sonra orada mühəndislik işləri bərbad vəziyyətə düşüb.

1916-cı ildən, Rankidə istehkamlar qurulduğundan, ada kənar şəxslər üçün bağlanıb və Finlandiya tərəfindən müstəqillik elan edildikdən sonra ölkənin Müdafiə Qüvvələri tərəfindən istifadə edilib. Rankidə 30-a yaxın bina və ya sığınacaq, həmçinin bir neçə qala var.

QAZİLER.AZ